Occitània Arroja

    Dens un contèxte de tensions entre la classa tribalhaira e la borguesia, la des·hèita militara de l'Estat francés contra l'alemand qu'ac tot en·hueca. Lo 18 de març 1871, lo pòble parisenc que's susmauta e que declara la Comuna de Paris. Aquesta insurreccion que ganha autes lòcs de l'Exagòne : lo 22 de març 1871, la Comuna qu'ei declarada peu pòble marselhés. Mes lo govèrn versalhés deu Partit de l'Òrdi que massacra los e las arrevolucionàrias au cors de la Setmana Sagnosa, deu 21 au 28 de mai 1871.     150 ans après, lo capitalisme que contunha a semiar la misèria e la mort. E las arreïvindicacions deus e las comunardas que demòran - mei que jamei - d'actualitat.

Badut lo 07/03/1949 a Arrigorriaga (EH), José Miguel Beñarán Ordeñana qu'èra conegut damb lo nom de "Argala". Militant de terrenh de l'organizacion basca Euskadi Ta Askatasuna (ETA), que participè en 1973 a l'execucion deu Luis Carrero Blanco, president deu govèrn fascista espanhou. Teorician marxista-leninista, que contribuii a reformar lo Movement de Liberacion Nacionau Basco (MLNV) en espandir l'organizacion en fronts (damb lo son  Agiri ). Ua de las soas frasas mei celèbras - e enqüèra utilizada peus mieis independentistas bascos - qu'ei : "que debem tot·a·s balhar quauquarren entà que quauquarrés ne balhin pas tot" (1). Qu'estó assassinat peus fascistas deu Batallón Vasco Español lo 21/12/1978 a Angelu (EH), on demoraba com arrefugiat politic. (1) Maider Jauregui :  Herri Biltzarra de Urduña en Iraultzen  (arrevista deu sindicat Langile Abertzaleen Batzordeak (LAB) nº 136, 16/05/2006, p. 4)