MONTANÈR — Ua peticion contra la privatizacion deu castèth
Ciutadan·a·s deu Montanerés que's mobilizan contra lo perilh de privatizacion de la sèrra deu castèth. "Ciutadans deu Montanerés e deus entorns" que hiquèn en linha ua peticion (en francés) contra "l'integracion d'un prestatari privat entà la gestion deu castèth de Montanèr". Lo collectiu qu'averteish suu perilh qu'aquesta decision deu Conselh Departamentau "hiqui en question lo dret d'accès au lòc". En la peticion, en mei de brembar las multiples utilizacions d'aqueth lòc ("eveniments culturaus, esportius e conviviaus"), qu'exprimeishen la lor incomprehencion de cap ad aquesta decision – presa en "l'abséncia d'informacion e de concertacion", e que demandan "l'arretirada deu projècte de Delegacion de Servici Public e l'engatjament d'un projècte damb lo territòri". La peticion qu'ei dejà passada davant las 500 signaturas.